Cyflogwr o orllewin Cymru wedi’i gydnabod yng Ngwobrau Partneriaid Gwerthfawr Gyrfa Cymru 2026

Mae Gyrfa Cymru wedi cyhoeddi enwau wyth enillydd Gwobrau Partneriaid Gwerthfawr 2026 mewn seremoni a gynhaliwyd ar 28 Ionawr 2026 yn y Senedd ym Mae Caerdydd.

Yng ngorllewin Cymru, mae un cyflogwr wedi cael ei gydnabod am ei gyfraniad sylweddol at addysg gyrfaoedd:

• Hyrwyddwr Gorau’r Gymraeg yn y Gweithle: Bwrdd Iechyd Prifysgol Bae Abertawe

Mae’r gwobrau blynyddol yn cydnabod sefydliadau sydd wedi mynd y tu hwnt i ddisgwyliadau wrth weithio gydag ysgolion i ddarparu profiadau gyrfaoedd o ansawdd uchel, deniadol ac ystyrlon sy’n helpu disgyblion i gysylltu dysgu yn yr ystafell ddosbarth â chyfleoedd yn y byd go iawn.

Dros y flwyddyn ddiwethaf, mae’r cyflogwyr buddugol wedi darparu gweithdai, mentora, ymweliadau â gweithleoedd ac ystod eang o weithgareddau a gynlluniwyd i ysbrydoli disgyblion, ehangu eu gorwelion a’u cefnogi i wneud dewisiadau gwybodus am eu dyfodol.

Datgelwyd yr enillwyr, sy’n dod o leoliadau ledled Cymru, yn fyw gan gyflwynydd y digwyddiad, Sian Lloyd.

Dywedodd Nikki Lawrence, Prif Weithredwr Gyrfa Cymru: “Rydym yn falch iawn o ddathlu enillwyr eleni, y mae eu cefnogaeth wedi gwneud gwahaniaeth gwirioneddol a pharhaol i bobl ifanc ledled Cymru. Mae eu parodrwydd i rannu eu hamser, eu gwybodaeth a’u profiad yn chwarae rhan hanfodol wrth ymgysylltu â disgyblion a’u helpu i archwilio llwybrau gyrfa sydd ar gael iddynt a deall byd gwaith.

“Ar fy rhan i a phawb yn Gyrfa Cymru, hoffwn estyn ein llongyfarchiadau cynhesaf a’n diolch i’n holl enillwyr ac enwebeion am y gefnogaeth amhrisiadwy maen nhw’n ei darparu.”

Dywedodd y Gweinidog Sgiliau, Jack Sargeant: “Llongyfarchiadau i holl enillwyr ac enwebeion Gwobrau Partneriaid Gwerthfawr eleni. Mae’r sefydliadau hyn yn dangos pŵer partneriaeth rhwng cyflogwyr ac ysgolion wrth agor drysau i’n pobl ifanc.

“Rwy’n falch o weld Atlas Copco yn cael ei gydnabod fel y newydd-ddyfodiad gorau – fel fy nghyn-gyflogwr, rwy’n gwybod o brofiad uniongyrchol y gwerth maen nhw’n ei roi ar ddatblygu talent ifanc. Drwy rannu eu harbenigedd a darparu profiadau o’r byd go iawn, maen nhw’n helpu i adeiladu gweithlu medrus a hyderus ar gyfer dyfodol Cymru.”

Dywedodd Victoria Williams, Rheolwr Gyrfaoedd, Ehangu Mynediad a Phrofiad Gwaith a Melanie Lloyd, Swyddog Cymorth Ehangu Mynediad a Chytundeb Anrhydeddus gyda Bwrdd Iechyd Prifysgol Bae Abertawe: “Rydym wrth ein bodd bod Bwrdd Iechyd Prifysgol Bae Abertawe wedi cael ei gydnabod fel Hyrwyddwr Gorau’r Gymraeg yn y Gweithle’. Mae cefnogi pobl ifanc i ddatblygu eu hyder yn y Gymraeg ac i weld ei gwerth go iawn ym maes gofal iechyd, yn rhywbeth rydyn ni’n angerddol iawn amdano. Drwy ein partneriaethau rhwng ysgolion a cholegau, gwaith ehangu mynediad a rhaglenni prentisiaeth, ein nod yw creu cyfleoedd sy’n ysbrydoli’r genhedlaeth nesaf ac yn dathlu pwysigrwydd dwyieithrwydd o fewn GIG Cymru. Rydym yn falch o gael cydweithio â Gyrfa Cymru i helpu pobl ifanc i fagu hyder, codi dyheadau a gweld y GIG fel lle croesawgar a chynhwysol i ddechrau eu gyrfa. Mae’n fraint cael chwarae rhan yn y broses o helpu pobl ifanc i archwilio eu talentau, magu eu hyder a’u grymuso am eu dyfodol.”

Dyma’r rhestr lawn o gategorïau ac enillwyr:

Gwobr Cyflawniad Eithriadol:
Hafren Dyfrdwy

Y Newydd-ddyfodiad Gorau:
Atlas Copco

Y Berthynas Barhaus Orau ag Ysgol:
Voco Dewi Sant, Caerdydd

Y Cyflogwr Profiad Gwaith Mwyaf Cefnogol:
Ymddiriedolaeth Pentref Cambrian

Y Busnes Bach Mwyaf Cefnogol:
Caffi’r Cwt Potio

Hyrwyddwr Gorau’r Gymraeg yn y Gweithle:
Bwrdd Iechyd Prifysgol Bae Abertawe

Cefnogwr Gorau’r Agenda Sero Net:
Morlais

Cyfraniad Personol Eithriadol:
Conor Lynn – Cyfreithwyr Berry Smith

Gallwch ddarllen mwy am y Gwobrau Partneriaid Gwerthfawr ar wefan Gyrfa Cymru.

Am ragor o wybodaeth am ymgysylltiad cyflogwyr ag ysgolion, ewch i dudalennau cyflogwyr Gyrfa Cymru neu cysylltwch â cyswlltcyflogwyr@gyrfacymru.llyw.cymru.